ရန်ကုန်အစိုးရရုံးများတွင် လုံခြုံရေးတင်းကျပ်

NEJ/ ၁၄ ဇူလိုင် ၂၀၀၈

ရန်ကုန်ရှိ အစိုးရဌာနဆိုင်ရာများအားလုံးတွင် လုံခြုံရေး တင်းကျပ်စစ်ဆေးရန် ညွှန်ကြားထား ကြောင်း နေပြည်တော်သတင်းရပ်ကွက်မှ သိရသည်။
ဘဏ္ဍာရေးနှင့် အခွန်ဝန်ကြီးဌာနမှ တာဝန်ရှိသူတဦးက “ဌာနဆိုင်ရာတွေမှာ လုံခြုံရေး တိုးမြှင့်ဖို့ အတွက် အထက်က ပြီးခဲ့တဲ့ ဇွန် (၂၇) ရက်မှာ စတင် ညွှန်ကြားတာပါ။ ညွှန်ကြားချက်အရ မိမိတို့ ရုံးက ၀န်ထမ်းတွေအနေနဲ့ အလှည့်ကျ စောင့်ရမှာဖြစ်တယ်” ဟု ပြောသည်။ ဆက်ဖတ်ရန် အပြည့်အစုံ ကို Click နှိပ်ပါ။

ဘဏ္ဍာရေးနှင့်အခွန်ဝန်ကြီးဌာနအနေဖြင့် ၎င်းတို့ဌာနအောက်ရှိ ပြည်တွင်းအခွန်များဦးစီးဌာန ဦးစီးရုံးအပါအ၀င် ဌာနခွဲများ၊ ပြည်ပသို့ ထွက်ခွာသွားသူများအား စိစစ်ရေးအဖွဲ့၊ ရန်ကုန်တိုင်း အခွန်ဦးစီးဌာနမှူးရုံး၊ ကုမ္ပဏီများဆိုင်ရာ အခွန်ရုံး အမှတ် (၁)၊ (၂) တို့ တည်ရှိသည့် အဆောက် အအုံများရှိ တာဝန်မှူးများ၊ တာဝန်ကျသူများ၊ အစောင့်များနှင့် သီးခြားအစောင့် မရှိသော ဌာန အဆောက်အအုံများအား ညအချိန်နှင့် ရုံးပိတ်ရက်များတွင် လှည့်လည်စစ်ဆေးကြည့်ရှုရန် တာဝန်များ ချပေးထားကြောင်း အဆိုပါ ဘဏ္ဍာရေးနှင့် အခွန်ဝန်ကြီးဌာနမှ အရာရှိဖြစ်သူက ပြောသည်။
ဝန်ကြီးဌာနအသီးသီးရှိ ဌာနဆိုင်ရာရုံးများတွင်လည်း ထိုပုံစံအတိုင်း တာဝန်ခွဲဝေချထားကြောင်း သိရသည်။
ယခုအခါ ရန်ကုန်မြို့ရှိ ဌာနဆိုင်ရာရုံးများ အသီးသီး၌ အစောင့်များချကာ တံခါးများကို လိုအပ်မှ ဖွင့်ပေးပြီး ရုံးတွင်းသို့ ၀င်ခွင့်ပေးကြောင်း ယာဉ်ထိန်းရုံးသို့ ကိုယ်တိုင်သွားရောက်ခဲ့သူတဦးက ပြောသည်။ “အရင်တုန်းကတော့ (၅၁) လမ်း ယာဉ်ထိန်းရုံးမှာ တံခါး တခါမှ မပိတ်ထားဖူးဘူး။ အခုတော့ တံခါးကို အလုံပိတ်ထားပြီး လာတဲ့လူကို သေသေချာချာ စိစစ်မေးမြန်းပြီးမှ ၀င်ခွင့်ပြုတယ်” ဟု ၎င်းကပြောသည်။ဇူလိုင် (၁) ရက်တွင် အမှတ် (၆) ရပ်ကွက် ရွှေပြည်သာမြို့နယ်ရှိ ကြံ့ဖွံ့ရုံးတွင် ဗုံးပေါက်ကွဲမှု ဖြစ် ပွားခဲ့သည့်အတွက် ယခုကဲ့သို့ ညွှန်ကြားချက်များဖြင့် ဌာနဆိုင်ရာ ရုံးတိုင်း လုံခြုံရေး ချထားခြင်း ဖြစ်ကြောင်း ယာဉ်ထိန်း တပ်ဖွဲ့ဝင် ရဲသားတဦးက ပြောသည်။
စွမ်းအားမြှင့် မြန်မာကျောင်းသားစစ်သည်တော်များအဖွဲ့ကလည်း အင်တာနက်ဝက်ဘ်ဆိုဒ်များ တွင် ၎င်းတို့အနေဖြင့် နအဖနှင့် ပတ်သက်သည့် အရာများအား ဖောက်ခွဲရေးများ ပြုလုပ်မည် ဖြစ်ကြောင်း ကြေညာချက်များ ထွက်ပေါ်ခဲ့သည်။ ထို့နောက် ယခုကဲ့သို့ အစိုးရဌာနဆိုင်ရာရုံးများ လုံခြုံရေး တင်းကျပ်လာခြင်းဖြစ်သည်။ ။