ရန်ကုန်မြို့ သိမ်ဖြူလမ်း မီးပွိုင့်တွင် ဆိုလာပြားမရှိသည့် တိုင်တခု
NEJ/ ၁၄ ဇူလိုင် ၂၀၀၈
နာဂစ်မုန်တိုင်း တိုက်ခတ်ပြီး (၂) လကျော်သည့်တိုင် မုန်တိုင်းကြောင့် ပျက်စီးသွားသည့် ရန်ကုန် မြို့ရှိ မီးပွိုင့်များ၊ ယာဉ်ထိန်းနားခိုတဲများနှင့် ဆိုလာပြားများကို ထိထိရောက်ရောက် ပြန်လည် ပြင်ဆင်မှုများ မရှိသေးဟု ရန်ကုန်မြို့ခံများက ပြောသည်။
ရန်ကုန်မြို့တော်စည်ပင်သာယာရေးကော်မတီမှ အင်ဂျင်နီယာတဦးက မီးပွိုင့်များ၊ ဆိုလာပြားများ ပြင်ဆင်မှု နှောင့်နှေးကြန့်ကြာရသည်မှာ ပလက်ဖောင်းထရပ်ကားများ မလုံလောက်သည့်အတွက် ဖြစ်သည်ဟု ပြောသည်။ ဆက်ဖတ်ရန် အပြည့်အစုံ ကို Click နှိပ်ပါ။
၎င်းက “ဒီပလက်ဖောင်းထရပ်ကားနဲ့ လိုက်ပြီး ပြင်ဆင်မှုတွေ လုပ်ရတယ်။ ဒါပေမယ့် အဲဒီထရပ် ကားမျိုးက မြို့တော်စည်ပင်မှာ တစီးတည်းသာရှိတယ်။ ရှိတဲ့တစီးကလည်း မကြာခဏ စက်ပိုင်း ဆိုင်ရာ ချို့ယွင်းနေတယ်” ဟု ပြောသည်။
ရန်ကုန်တမြို့လုံးတွင် မီးပွိုင့်ပေါင်း (၁၂၉) ခုရှိပြီး ပွိုင့်များတွင် ယာဉ်ထိန်းနားခိုတဲ စုစုပေါင်း (၁၁၈) ခုရှိကာ ဆိုလာပြားများ တပ်ဆင်ထားသည့် မီးပွိုင့် (၅၀) ကျော်ရှိကြောင်း အပတ်စဉ်ထုတ် ရန်ကုန်အခြေစိုက် ပြည်တွင်းသတင်းဂျာနယ်များတွင် ဖော်ပြသည်။
မုန်တိုင်းကြောင့် မီးပွိုင့်ပေါင်း (၁၂၉) ခုတွင် (၁၀၀) ကျော် ပျက်စီးပြီး ဆိုလာပြား (၅၀) ကျော် အနက် လုံးဝပျက်စီးသွားသည့် ဆိုလားပြားတိုင် (၁၀) ခုခန့်ရှိကာ ကျန်သည့် ဆိုလားပြားများမှာ မပျက်စီးသော်လည်း ဆိုလာပြားနှင့် ချိန်ဆက်အသုံးပြုရသော အင်ဗာတာဘက်ထရီများ အားလုံး နီးပါး ပျက်စီးနေသည်ဟု အဆိုပါ မြို့တော်စည်ပင်မှ အင်ဂျင်နီယာက ပြောသည်။
ရန်ကုန်မြို့တွင် လျှပ်စစ်မီးကို အားမကိုးရဘဲ နေရောင်ခြည်ဖြင့် အသုံးပြုရသည့် ဆိုလားပြားများကို အသုံးပြုသည့်စနစ်ဖြင့် မီးပွိုင့်အချို့ကို အသုံးပြုနေခြင်းဖြစ်သည်။ ယင်းစနစ်တွင် မီးပွိုင့်အနီး တပ်ဆင်ထားသော ဆိုလာပြားတိုင်မှတဆင့် ယာဉ်ထိန်းနားခို တဲအတွင်း ထားရှိသည့် အင်ဗာတာ ဘက်ထရီမှ မီးပွိုင့်သို့ မီးပေးနေခြင်းဖြစ်သည်။
သို့သော် မီးပွိုင့်အားလုံးတွင် ဆိုလားပြားတိုင်များ တပ်ဆင်နိုင်ခြင်း မရှိသည့်အတွက် မီးပွိုင့်အများ စုမှာ လျှပ်စစ်မီးကိုသာ အသုံးပြုနေရဆဲဖြစ်သည်။ မြို့တော်စည်ပင် နယ်နိမိတ်အတွင်း မြို့နယ် (၃၃) မြို့နယ် ရှိသည့်အနက် ရန်ကုန်မြို့တွင်း (၆) မြို့နယ်ဖြစ်သည့် ဗိုလ်တထောင်၊ ပုစွန်တောင်၊ ကျောက်တံတား၊ လသာ၊ ပန်းပဲတန်းနှင့် လမ်းမ တော်မြို့နယ်များတွင်သာ မီး (၂၄) နာရီ ပေးကြောင်း၊ ကျန်မြို့နယ်များတွင် မီးပျက်ချိန်က များနေကြောင်း ပန်းပဲတန်းမြို့နယ်တွင် နေထိုင်သူတဦးက ပြောသည်။
၎င်းက “ဒါတောင် မြို့ထဲက (၆) မြို့နယ်မှာ (၂၄) နာရီ ပေးတယ်ဆိုထားပေမယ့် မီးက ပျက်တလှည့် လာတလှည့်ပဲ။ (၂၄) နာရီ ကွက်တိရတယ်ဆိုတာ မရှိပါဘူး” ဟု ပြောသည်။
အစိုးရ လျှပ်စစ်စွမ်းအားဌာန (အီးပီစီ) မှ မီးပေးသဖြင့် လျှပ်စစ်မီးလာချိန်တွင် အကောင်းအတိုင်း ရှိသည့် မီးပွိုင့်များမှ ယာဉ်အချက်ပြ မီးလင်း၍ အလုပ်လုပ်သော်လည်း မီးပျက်သည့်အချိန်တွင် ဆိုလာစနစ်ဖြင့် မီးပွိုင့်များ အလုပ်မလုပ်သည့်အတွက် ယာဉ်ကြောပိတ်ဆို့မှုများ၊ ယာဉ်တိုက်မှုများ ရှိနေဆဲ ဖြစ်သည်ဟုလည်း မြို့ခံများက ပြောသည်။
ယာဉ်ထိန်းနှင့် မြို့တော်စည်ပင်က ယာဉ်ကြောပိတ်ဆို့မှုနှင့် ပတ်သက်၍ အပြစ်များကို တလှည့်စီ ပြောဆိုမှုများ ရှိနေသော်လည်း မုန်တိုင်းတိုက်ခတ်ပြီး (၂) လကျော်သည့်တိုင် မီးပွိုင့်များကို ပြင်ဆင်နိုင်ခြင်း မရှိသေးသည်မှာ အထင်အရှားဖြစ်ကြောင်း အငြိမ်းစား စည်ပင်ဝန်ထမ်းတဦးက ပြောသည်။
“ယာဉ်ထိန်းရဲတွေ ဖမ်းဆီးဒဏ်ရိုက်လို့ရတဲ့ ငွေတွေကို စည်ပင်ဝင်ငွေအဖြစ် ပေးရတယ်။ သူတို့ရဲ့ လစာကိုတော့ စည်ပင်က ပေးတယ်။ အခု ပြုပြင်ရမယ့် ပွိုင့်တွေကျ စည်ပင်က မပြင်ဘူး၊ လိုအပ်တဲ့ ယာဉ်အင်အား၊ ၀န်ထမ်းအင်အား မရှိလို့လေ။ ဒါဆို ရဲတွေကလည်း ပွိုင့်တွေမှာ သေသေချာချာ ထိန်းသိမ်းပေးသင့်တာပေါ့၊ အခုတော့ အဲလိုမဟုတ်ဘဲ သူတို့အချင်းချင်းသာ အပြစ်ပြောနေကြ တယ်။ ရန်ကုန်နယ်နိမိတ်တွင်းက ယာဉ်ထိန်းနားခိုတဲပျက်တွေ မပြင်နိုင်သေးတာလည်း မြို့တော် ၀န်က ငွေကြေးချပေးတာ နှောင့်နှေးလို့ဖြစ်တယ်” ဟု ၎င်းက ပြောသည်။
ရန်ကုန်မြို့တော်စည်ပင်သာယာရေးကော်မတီက ၎င်းတို့၏ ၀င်ငွေမှာ တနှစ်လျှင် ကျပ် (၃၀) ဘီလီယံခန့်ရှိသည်ဟု ထုတ်ဖော်ပြောဆိုကြောင်း ပြည်တွင်းဂျာနယ်များတွင် ဖော်ပြသည်။ ။
No comments:
Post a Comment