ဒုက္ခသည်များအပေါ် စောင့်ရှောက်ရေးညံ့သည့်နိုင်ငံစာရင်းတွင် ထိုင်းနိုင်ငံပါဝင်

ကိုဝိုင်း/ ၁၅ ဇူလိုင် ၂၀၀၈

ထိုင်းနိုင်ငံက နိုင်ငံအတွင်းရှိ ဒုက္ခသည်များကို စခန်းများအတွင်း နှစ်ပေါင်းများစွာ ကန့်သတ် ထိန်းသိမ်းထားခြင်းနှင့် အချို့ကို အန္တရာယ်ရှိနိုင်သော နေရပ်ရင်းသို့ အဓမ္မပြန်ပို့ခြင်းတို့ကြောင့် ဒုက္ခသည်များအတွက် အဆိုးရွားဆုံးနေရာ (၁၀) ခုစာရင်းအတွင်း ထိုင်းနိုင်ငံအား ထည့်သွင်း ကြောင်း အစီရင်ခံစာတရပ်တွင် ဖော်ပြထားသည်။ ဆက်ဖတ်ရန် အပြည့်အစုံ ကို Click နှိပ်ပါ။
အမေရိကန်နိုင်ငံ ဒုက္ခသည်များနှင့် ရွှေ့ပြောင်းနေထိုင်သူများဆိုင်ရာကော်မတီ (USCRI) ၏ ယခင်လ ထုတ်ပြန်ချက်၌ ယခုကဲ့သို့ ဖော်ပြထားခြင်းဖြစ်သည်။ ထိုင်း-မြန်မာနယ်စပ် ထိုင်းနိုင်ငံ ဘက်ခြမ်းရှိ ဒုက္ခသည်စခန်း (၉) ခုမှ မြန်မာဒုက္ခသည် (၁) သိန်းကျော်ကို စခန်းများအတွင်း၌ ထိန်းချုပ်ထားပြီး အလုပ်လုပ်ခွင့် မပြုကြောင်း ယင်းအစီရင်ခံစာ၌ ဝေဖန်ဖော်ပြထားသည်။
ယင်းကိစ္စနှင့် ပတ်သက်၍ ကရင်ဒုက္ခသည် ကော်မတီ (ကေအာစီ) အတွင်းရေးမှူး (၁) ဖြစ်သူ ဆရာဂျော့အား ခေတ်ပြိုင်က ဆက်သွယ်မေးမြန်းရာ မြန်မာဒုက္ခသည်များအနေဖြင့် စခန်းပြင်ပ၌ တရားဝင် အလုပ်ထွက် လုပ်နိုင်ရေးအတွက် ထိုင်းအစိုးရ၊ ယူအန်အိတ်ခ်ျစီအာ၊ အိုင်အယ်လ်အို၊ ထိုင်းစီးပွားရေး လုပ်ငန်းရှင်ကြီးများ အပါအ၀င် အခြားသက်ဆိုင်ရာ အဖွဲ့အစည်းများ ပူးပေါင်း၍ အချက်အလက် ရှာဖွေစုံစမ်းမှုများကို ၂၀၀၇ ခုအတွင်း၌ ပြုလုပ်ခဲ့ပြီးဖြစ်ကြောင်း၊ သို့သော် အောင်မြင်မှု မရှိသေးကြောင်း ပြောသည်။
ဆရာဂျော့က “လောလောဆယ်ကတော့ အလုပ်လုပ်ခွင့် မရှိဘူး။ အခက်အခဲတွေ အမျိုးမျိုးရှိတယ် လေ။ လုံခြုံရေး၊ ငြိမ်ဝပ်ပိပြားရေး၊ မှုခင်းတို့၊ မူးယစ်ဆေးဝါးတို့ သူတို့လည်း အများကြီး စဉ်းစားရ တယ်လေနော်။ လာညှိနှိုင်းသွားတာကတော့ စက်ရုံ အလုပ်ရုံတွေဖွင့်မယ်။ စခန်းနဲ့ နီးတဲ့နေရာတွေ ဘာတွေမှာ လာကြည့်သွားတာပဲ။ ထိုင်းဘက်က စက်ရုံပိုင်ရှင်ကြီးတွေ၊ သူဌေးကြီးတွေလည်း လာကြတာပဲ။ အောင်မြင်မှုတော့ မရှိသေးဘူးလေ” ဟု ပြောသည်။
ထို့ပြင် အဆိုပါ စခန်း (၉) ခုမှ ဒုက္ခသည်များအနေဖြင့် စခန်းအတွင်း၌ နှစ်ပေါင်းကြာမြင့်စွာ နေရ သဖြင့် ငြီးငွေ့လာခြင်း၊ အကူအညီ အထောက်အပံ့များအပေါ်သာ မှီခိုနေရခြင်းတို့ကြောင့် အပြင် ထွက်၍ ၎င်းတို့နှင့် ကိုက်ညီမည့် အလုပ်များကို လုပ်လိုစိတ်များ ရှိနေကြခြင်း ဖြစ်သည်ဟုလည်း ဆက်ပြောသည်။
ဆရာဂျော့က “လူတိုင်းကတော့ ထွက်ပြီး အလုပ်လုပ်ချင်ကြတာပဲလေ။ အလုပ်ကြမ်းဆိုလည်း အလုပ်ကြမ်းပေါ့။ စက်ရုံဆိုလည်း လုပ်နိုင်တဲ့လူ ရှိသလို၊ စိုက်ပျိုးရေးမှာ လုပ်နိုင်တဲ့လူ ရှိမှာပေါ့လေ။ ဒါပေမယ့် ဘယ်လို အကောင်အထည် ဖော်နိုင်မလဲ၊ အခက်အခဲ ဘယ်လောက်ရှိမယ်ဆိုတာတော့ ဘယ်သိမလဲ၊ ထိုင်းအစိုးရရဲ့ ပူးပေါင်းပါဝင် ခွင့်ပြုမှု ဘယ်အတိုင်းအတာအထိ ရှိမလဲ ဆိုတာလည်း မသိဘူးပေါ့နော်” ဟု ပြောသည်။
ဒုက္ခသည်အခွင့်အရေးဆိုင်ရာ ၁၉၅၁ ခု ကုလသမဂ္ဂ သဘောတူညီချက်အား လက်မှတ်ထိုးထား ခြင်းမရှိသော်လည်း လူသားချင်းစာနာမှုဖြင့် မြန်မာဒုက္ခသည်များကို ယခုကဲ့သို့ လက်ခံထားခြင်း သာ ဖြစ်ကြောင်း ထိုင်းနိုင်ငံက အစဉ်အမြဲ ထုတ်ဖော်လေ့ရှိသည်။
ထိုင်းနိုင်ငံရှိ ဒုက္ခသည်စခန်းများမှာ ချင်းမိုင်ခရိုင်အတွင်း (၁) ခု၊ မယ်ဟောင်ဆောင်ခရိုင်အတွင်း (၄) ခု၊ တာ့ခ်ခရိုင်အတွင်း (၃) ခု၊ ကန်ချနဘူရီနှင့် ရတ်ခ်ျဘူရီတို့တွင် (၁) ခုစီတို့ ဖြစ်ကြပြီး လူဦး ရေ (၁၃၉,၇၆၈) ဦးရှိကြောင်း တီဘီဘီစီခေါ် ဒုက္ခသည်များကို ကူညီနေသည့် ထိုင်း-မြန်မာ နယ်စပ် အကူအညီပေးရေးအဖွဲ့၏ ယခင်လ စာရင်း၌ ဖော်ပြသည်။ ။