စည်းကမ်းသစ်ကြောင့် ရန်ကုန်လူထု ကမောက်ကမဖြစ်

အေးချမ်းမြေ့ ဇူလိုင် ၂၁၊ ၂၀၀၈

ရန်ကုန်မြို့လယ် လမ်းမကြီးများတွင် သွားလာကြသော ခရီးသည်တင်ယာဉ်များနှင့် ကိုယ်ပိုင်ယာဉ်များ သီးခြားစီခွဲ၍ မောင်းနှင်ရပြီး ခရီးသည်တင်ယာဉ်များမှာ တစီးကိုတစီး ကျော်တက်ခွင့် မရှိဘဲ တန်းစီစနစ်ဖြင့် မောင်းနှင်ရန် သတ်မှတ် ထားကြောင်း ရန်ကုန်မြို့ခံများထံမှ ကြားသိရသည်။ ဆက်ဖတ်ရန် အပြည့်အစုံ ကို Click နှိပ်ပါ။
“ရန်ကုန်တိုင်းမှူး ပြောင်းတဲ့နောက်ပိုင်းမှာ ဒီအစီအစဉ် စတာပါ။ ခုလိုလုပ်တာ တပတ်လောက်ပဲ ရှိသေးတယ်။ စည်းကမ်းတကျ ဖြစ်အောင်လို့တော့ ပြောတာပဲ။ ဒါပေမယ့် ကျနော်တို့ နေ့တိုင်း ရုံးနောက်ကျတယ်” ဟု အင်းစိန်မြို့ နယ်မှ ရန်ကုန်မြို့တွင်းသို့ နေ့စဉ်ရုံးတက် ရုံးဆင်း ပြုလုပ် နေသည့် ကုမ္ပဏီဝန်ထမ်း တဦးက ပြောသည်။

ခရီးသည်တင်ယာဉ်များမှာ မှတ်တိုင်တွင်ရပ်၍ အချိန်ကြာ မြင့်စွာ လူတင်ခွင့်မရှိတော့ဘဲ လူအတင်အချ ပြုလုပ်ပြီး သည်နှင့် ချက်ချင်း မှတ်တိုင်မှ ထွက်ခွာရသည်။ ထွက်ခွာပြီး သည့်နောက်တွင်လည်း တခြားယာဉ်များကို ကျော်တက်ခြင်း မပြုဘဲ ခရီးသည်တင်ယာဉ်များသွားရန် သတ်မှတ်ထားသည့် ယာဉ်ကျော၌ တခြားခရီးသည်တင်ယာဉ်များ နောက်မှ တန်းစီလိုက်ပါရသည်ဟု သိရသည်။

“သိမ်ကြီးဈေးလောက်ကနေ ဆိပ်ကမ်းသာလမ်းလောက် ရောက်ဖို့ နာရီဝက်လောက်မောင်းရတယ်။ ခရီးသိပ် မဝေးရင် လမ်းလျှောက်။ ရုံးနောက်ကျ မခံနိုင်ရင် တက္ကစီငှားစီး အဲလိုပဲလုပ်ရတာပဲ” ဟု ၎င်းကုမ္ပဏီဝန်ထမ်း က ပြောသည်။

ယခင် ရန်ကုန်တိုင်း တိုင်းမှူး ဗိုလ်မှူးချုပ်လှဌေးဝင်း နေရာတွင်ရောက်ရှိလာသော တပ်မ(၇၇)မှ ဗိုလ်မှူးချုပ် ဝင်းမြင့်က ရန်ကုန်မြို့ကို စည်းကမ်းတကျဖြစ်စေရန် ယခုကဲ့သို့ စတင် ကိုင်တွယ်ခြင်း ဖြစ်သည်ဟု ရန်ကုန် အခြေစိုက် သတင်းထောက် တဦးက ပြောပြသည်။

“ကားသမားတွေတော့ တော်တော်ညည်းကြတယ်။ ခုလိုတစီးနောက်က တစီးလိုက်နေရတော့ တနေ့စာ ခေါက်ရေမပြည့် တော့ဘူး။ ဝင်ငွေလျော့ကုန်တယ်လို့ ပြောတယ်။ တခြားအချိန်တွေ ပြဿနာ မရှိပေမယ့် ရုံးတက် ရုံးဆင်းချိန်တွေမှာ တော်တော်လေး အဆင်မပြေဘူး” ဟု ၎င်းကဆက်ပြောသည်။

ယခုနောက်ပိုင်း ရန်ကုန်မြို့တွင် စည်းကမ်းထိန်းသိမ်းရေးများ ပိုမိုတင်းကျပ်သည့် အနေနှင့် လမ်းဘေး ဈေးသည်များ ကိုလည်း ရှင်းလင်းထားပြီး လှည်းတန်း အစရှိသည့် ဆင်ခြေဖုံး ဒေသများတွင် လမ်းဘေး ဈေးသည်များကို လုံးဝ မတွေ့ရ တော့ကြောင်း သူက ပြောသည်။

“တယောက်ပြောင်းလာလိုက် တမျိုးစမ်းကြည့်လိုက်နဲ့ လူတွေကတော့ အစမ်းသပ်ခံပါပဲ။ တကယ်ခံရတာက လက်လုပ် လက်စားတွေ၊ ပျံကျ ဈေးသည်တွေပါ။ ဖမ်းတယ်၊ ဆီးတယ် ဆိုတာနဲ့ သူတို့တွေအားလုံး အခြေပျက်ကုန်ကြတာ။ ခု ဘတ်စ် ကားကိစ္စလည်း ဒီလိုပဲ ခေါက်ရေမပြည့်ရင် အုံနာက မနစ်နာဘူး။ ကားသမား တွေက အိတ်စိုက်ဖြစ်ကုန်ကြကော” ဟု ရန်ကုန်သတင်းထောက်က သုံးသပ်သည်။ ယခုကာလသည် စမ်းသပ်ကာလဖြစ်နိုင်ပြီး အောင်မြင်နိုင်မည်ဟု မထင်ကြောင်း ၎င်းကဆက်ပြောသည်။

စက်သုံးဆီဈေးများ အဆမတန် မြင့်တက်ချိန်၊ ဒီဇယ်မှ စီအန်ဂျီယာဉ်များသို့ စတင်ပြောင်းခါစ၊ ယခုကဲ့သို့ စည်းကမ်း အသစ် စတင်ထုတ်ပြန်ချိန် စသည်ဖြင့် အပြောင်းအလဲကာလတိုင်းတွင် ခရီးသည်တင် ယာဉ် မောင်းများ၊ ယာဉ်နောက်လိုက်များ တွက်ခြေမကိုက်သည့် ဒုက္ခခံရသည်ဟု ရန်ကုန်မြို့တွင်း ပြေးဆွဲနေသည့် ခရီးသည်တင်ယာဉ်တစီးမှ ယာဉ်နောက်လိုက် တဦးက ပြောပြသည်။

“စည်းကမ်းအတိုင်း မလိုက်နာရင် ဖမ်းတယ်။ အဖမ်းခံရတာနဲ့ အလုပ်ရှုပ်၊ ပိုက်ဆံကုန်၊ ဝင်ငွေလျော့ ကုန်တော့ အဖမ်းမခံ ရဲဘူး။ လမ်းမှာ ရဲတွေ့သမျှကိုလည်း ၅၀၊ ၁၀၀ ဆက်ကြေးလို ပေးရသေးတယ်။ ပြီးတော့ တခုခု ဖြစ်ရင် ကျနော်တို့ပဲ နစ်နာတာ။ ဒီကြားထဲ လူတိုင်း ဒုက္ခရောက်တဲ့၊ နာဂစ်မုန်တိုင်း တိုက်တဲ့ အချိန်မျိုးမှာလည်း ကျနော်တို့ပါ ဒုက္ခရောက်ရတာ။ ဘယ်ဟာမှမလွတ်ဘူး” ဟု ၎င်းကပြောသည်။