ပြည်တွင်း သတင်းထောက်များ အာဇာနည်နေ့မှာ နှောင့်ယှက်ခံရ

NEJ/ ၂၁ ဇူလိုင် ၂၀၀၈

ပြီးခဲ့သည့် အာဇာနည်နေ့ (၁၉) ဇူလိုင်တွင် ပြည်တွင်းသတင်းထောက်များကို နအဖ အာဏာပိုင် များက နှောင့်ယှက်မှုများ လုပ်ခဲ့ကြောင်း သတင်းထောက်များက ပြောသည်။ ဆက်ဖတ်ရန် အပြည့်အစုံ ကို Click နှိပ်ပါ။
အာဇာနည်နေ့တွင် တာဝါလိန်းလမ်း ဗိုလ်ချုပ်ပြတိုက်၊ ရွှေတိဂုံဘုရား၊ ရွှေဂုံတိုင် အန်အယ်လ်ဒီ ရုံးချုပ်အနီး သွားရောက်ကြသည့် ပြည်တွင်းမှ သတင်းဂျာနယ်အချို့မှ သတင်းထောက်များအား နအဖအာဏာပိုင်များက ဓာတ်ပုံရိုက်ယူခြင်း၊ သတင်းထောက်ကင်မရာမှ ဓာတ်ပုံများကို ဖျက်ခိုင်းခြင်း စသည့် နှောင့်ယှက်မှုများ လုပ်ခဲ့ကြောင်း ကာယကံရှင် သတင်းထောက်များက ပြောသည်။
ဗိုလ်ချုပ်ပြတိုက်တွင် ဓာတ်ပုံအရိုက်ခံရသည့် သတင်းထောက်တဦးက “ပြတိုက်ထဲကို ကင်မရာရော အခြားဘာမှမယူရဘူးဆိုလို့ ဘာမှမပါဘဲ ဒီအတိုင်းဝင်တယ်။ ဒါကို အရပ်ဝတ် လူတယောက်က ကျနော့်မျက်နှာနားကပ်ပြီး ဓာတ်ပုံတွေရိုက်တယ်၊ ဒါနဲ့ ဘာလို့ ရိုက်ရသလဲ မေးတော့ မပြောဘဲ ပြန်ထွက်သွားတယ်၊ ကျနော်က လိုက်ဆွဲတော့ ကျနော်ကို တွန်းထုတ်တယ်။ ဒါနဲ့ ပြတိုက်တာဝန် ရှိသူကို သွားပြောတော့ တာဝန်အရလုပ်တာ၊ ကျနော့်မိသားစုလာရင်လည်း ဓာတ်ပုံကတော့ ရိုက်မှာပဲတဲ့” ဟု ပြောသည်။
အလားတူ ဗိုလ်ချုပ်ပြတိုက်သို့ ရောက်ရှိသွားသည့် အခြားသတင်းထောက်များကိုလည်း လိပ်စာ ကပ်ပြားများ တောင်းယူစစ်ဆေးပြီး ဂျာနယ်တိုက်သို့ စုံစမ်းမေးမြန်းကြောင်း၊ ထို့ပြင် ဓာတ်ပုံရိုက် ကူးခွင့် ကန့်သတ်မထားသည့် ရွှေတိဂုံရင်ပြင်တော်တွင် ဓာတ်ပုံရိုက်သည့် သတင်းထောက်များ ကိုလည်း ဂေါပကတံဆိပ်တပ် ၀တ်စုံဝတ်ထားသူများက ရိုက်ကူးထားသည့် ဓာတ်ပုံများကို ဖျက် ခိုင်းကြောင်း၊ ဖျက်ပေးရန် ငြင်းဆန်သူများကို ရဲက ခေါ်ယူဖျက်ခိုင်းကြောင်း ကိုယ်တိုင်ကြုံခဲ့ ရသူများက ပြောသည်။
သတင်းထောက် အချို့က ဖျက်ခိုင်းသည့် ဓာတ်ပုံများကို ဖျက်ပေးခဲ့ကြသော်လည်း အချို့က လွယ်လွယ်ကူကူ ဖျက်မပေးဘဲ ၎င်းတို့သည် ပြည်တွင်း၌ တရားဝင်ထုတ်ဝေနေသည့် ဂျာနယ်များမှ သတင်းထောက်များ ဖြစ်သဖြင့် ဓာတ်ပုံရိုက်ကူးခွင့်ရှိကြောင်း ပြောသဖြင့် အချေအတင် စကား များကြကြောင်း သိရသည်။
ယခုကဲ့သို့ စစ်အစိုးရက အာဇာနည်နေ့တွင် သတင်းထောက်များအပေါ် တိုးမြှင့်ဖိနှိပ်လာမှုအပေါ် ပုဂ္ဂလိကဂျာနယ်များမှ သတင်းထောက်များ၊ အယ်ဒီတာများက မကျေမနပ်ဖြစ်နေကြကြောင်း စုံစမ်းသိရသည်။
ရွှေဂုံတိုင်လမ်းဘက်တွင်မူ လမ်းထဲဝင်မည့်သူများအနက် မင်္သကာသူများ၏လွယ်အိတ်များကို ရှာဖွေ ပြီး ကင်မရာ ပါလာပါက သိမ်းဆည်းထားလိုက်ပြီး ပြန်ထွက်လာမှ ပြန်ပေးသည်ဟု သိရသည်။
အာဇာနည်နေ့တွင် အန်အယ်လ်ဒီရုံး ပတ်ဝန်းကျင်တလျှောက် ကားဝင်ခွင့် ပိတ်ပင်ထားသည့် အတွက် ကားများ ရှင်းနေသကဲ့သို့ စစ်ဆေးမည့်သူများ စောင့်ကြပ်နေသည့်အတွက် လူအ၀င် အထွက်နည်းကာ လုံခြုံရေးတပ်ဖွဲ့ဝင်များနှင့် အရပ်ဝတ် စွမ်းအားရှင်အဖွဲ့ဝင်များသာများသည်ဟု မြို့ခံများက ပြောသည်။ ။
Rest of your post