အနုပညာသည်များ ကူညီထောက်ပံ့မှု အရှိန်အဟုန်ကောင်း၊ အချို့နေရာတွင် နှောင့်ယှက်ခံရNEJ/ ၁၅ မေ ၂၀၀၈
လေဘေးဒုက္ခသည်များကို ကူညီထောက်ပံ့နေကြသည့် စာပေ၊ ရုပ်ရှင် အနုပညာသည်များ၏ ဆောင်ရွက်မှုများ အရှိန်အဟုန် ကောင်းလာသကဲ့သို့ နှောင့်ယှက်ခံရမှုများလည်း ရှိကြောင်း သိရသည်။
မုန်တိုင်းဒဏ် ဆိုးဆိုးဝါးဝါး ခံလိုက်ရသည့် မြို့များတွင် ကူညီထောက်ပံ့နိုင်ရန်အတွက် လူခွဲ ဖြန့်ပြီး လုပ်ဆောင်မှုများကြောင့် ပိုမိုထိရောက်စွာ လုပ်ဆောင်နိုင်ခြင်းဖြစ်ကြောင်း ထင်ရှားသည့် အနုပညာရှင် ကိုဇာဂနာက ပြောသည်။
၎င်းက “မြို့တိုင်း တော်တော်များများကို ကျနော်တို့ အခု ရောက်ကုန်ပါပြီ။ အခု ပန်းတနော်မှာ ဆိုရင် ကိုဧရာတို့အဖွဲ့၊ လပွတ္တာမှာဆိုရင် ကိုဝေဠုကျော်တို့အဖွဲ့ရှိတယ်။ ကိုငှက်ပျောကျော်တို့က မအူပင်နဲ့ ကွမ်းခြံကုန်းကို တာဝန်ယူထားပါတယ်။ ဒီကနေ ကိုယ့်လူနဲ့ကိုယ် ကျနော်တို့ဆီက အဖွဲ့ထဲက ရုပ်ရှင်သရုပ်ဆောင်တွေရော၊ တခြားပြည်သူတွေရော၊ တခြား စိတ်ပါဝင်စားတဲ့ လူငယ်တွေရော စုပြီးတော့ အထိုင်သွားနေတယ်။ ကျနော်တို့က ရန်ကုန်ကနေပြီး သူတို့ဆီက အကြောင်းကြားတာနဲ့ ကားနဲ့မနက်ကို ပုံမှန်ပို့ပါတယ်” ဟု ပြောသည်။ အနုပညာသည်များ၏ ကူညီထောက်ပံ့မှုများကို ဒုက္ခသည်များ တုံ့ပြန်မှုနှင့် ပတ်သက်ပြီး ကိုဇာဂ နာက “မနေ့က ကျနော်တို့အဖွဲ့ ကွမ်းခြံကုန်းကို ဆင်းပြီးပေးတဲ့ အချိန်မှာ ပြည်သူတွေ အကုန် လုံးက နေ့တိုင်းလာကြပါ သားတို့ရယ်၊ အမေတို့ကို ပစ်မထားပါနဲ့ဆိုပြီး ငိုယိုပြီးတော့ကို ကယ်တင်ရှင်တွေလာသလိုပေါ့ဗျာ၊ အဲလိုမျိုးကြီးကို ဖြစ်နေတာ” ဟု ပြောသည်။
ပြီးခဲ့သည့် မေ (၁၃) ရက်က ထောက်ပံ့ရေးပစ္စည်းများ သယ်ဆောင်လာသည့် ရုပ်ရှင်မင်းသား ကျော်သူနှင့်အဖွဲ့အား သံလျင်မှ ကျောက်တန်းအသွား လမ်းခုလတ်တွင် ကြံ့ဖွံ့ အဖွဲ့ဝင်များက နှောင့်ယှက်မှုများ ရှိခဲ့ကြောင်း သိရသည်။
ကျော်သူက “တညင်၊ ပါဒကြီးအကျော်မှာပေါ့လေ၊ အယောက် (၂၀) လောက်ရှိတယ်၊ ကားကို ၀င်ဝိုင်းတာပေါ့လေ၊ ထိခိုက်ဒဏ်ရာရမှုထိတော့မရှိဘူး၊ ကျနော်တို့လည်း မောင်းပြေးတဲ့ အပိုင်း ဖြစ်တာပေါ့၊ ကျနော်ပြောလည်း ပြောထားပြီးပါပြီ၊ ကျနော့်ကိုသာ ဆွဲစိပါတော့လို့” ဟု ပြောသည်။
ယင်းဖြစ်ရပ်အပေါ် ကိုဇာဂနာက “အဖြစ်မှန်က ဒီလိုဗျ။ နှောင့်ယှက်တယ်ဆိုတာထက် သူတို့က တောင်းတာဗျ။ တောင်းတဲ့ခါကျတော့ ကျနော့်သူငယ်ချင်း ကိုကိုမောင် (ကျော်သူ) က မပေး ချင်ဘူး။ မပေးချင်တော့ သူတို့က လုမယ်၊ ယက်မယ်အဆင့်ဖြစ်သွားတာပေါ့။ အမှန်တိုင်း ပြောရမယ်ဆိုရင်တော့ အဲဒီကြံ့ဖွံ့တွေကလည်း လေဘေးဒဏ် ခံနေရတဲ့ ကြံ့ဖွံ့တွေပါပဲ” ဟု ပြောသည်။ ယခု ကူညီထောက်ပံ့ပေးနေသော အနုပညာရှင်များနှင့် စစ်အစိုးရ ဖွဲ့စည်းပေးထားသော ရုပ်ရှင် အစည်းအရုံးမှ လေဘေးကူညီရေး အစီစဉ်များနှင့် မပတ်သက်ကြောင်း သိရသည်။ ။
Friday, May 16, 2008
အနုပညာသည်များ ကူညီထောက်ပံ့မှု အရှိန်အဟုန်ကောင်း၊
Subscribe to:
Post Comments (Atom)
No comments:
Post a Comment